Immersugassiat

Suliniutinut NORA-mut qinnuteqarniaraanni immersugassat tassani nassaassaapput - qinnuteqarnermiit suliniutip naammassinissaata tungaanut. Immersugassat qanoq atorneqarnissaat pillugu paasissutissat uani nassaarineqarsinnaapput.

• Qinnuteqarnermi immersugassaq (Ansøgningsskema)
Tassaavoq suliniutinut NORA-mit taperneqarnissamut qinnuteqarnermi pinngitsoorani immersugassaq. Suliniutiginiakkamut sukumiisumik nassuiaat, taamatullu ingerlatsinissamut pilersaarut missingersuutillu immersugassamut ilanngullugit nassiunneqassapput.

• Ingerlatsinermut isumaqatigiissut (Forvaltningskontrakten)
Suliniutip taperneqarnissaanik aalajangiisoqaraangat ingerlassassamik aqutsisussaq tapiinissamut akuersissummik nassinneqassaaq. Taamaattorli suliniutiginiakkap allartissinnaanera sioqqullugu - aningaasallu siulliit tunniunneqannginnerini - suliniummi aqutsisup NORA-llu akornanni isumaqatigiissusiortoqaqqaassaaq. Tamanna ingerlatsinermut isumaqatigiissut atorlugu pissaaq, taannalu immersorneqariarluni marlunngortillugu naqinneqassaaq, taakkulu atsioreernerisigut NORA-p allaffeqarfianut allakkatigut imaluunnit scannerlugit qarasaasiatigut nassiunneqassapput.

• Killiffimmik nalunaarusiaq (Statusrapport)
Immersugassaq taanna ingerlatsinermut isumaqatigiissusiornermut atatillugu siullermik immersorneqassaaq. Immersugassaq qarasaasiatigut immersorneqassaaq, kingornalu nora@nora.fo atorlugu NORA-p allaffeqarfianut nassiunneqassalluni. Killiffimmik nalunaarusiaq piffissani aalajangersimasuni nutarterneqartassaaq, taamaalilluni suliniutip ingerlaneranik NORA ilisimatinneqartassalluni. Killiffimmik nalunaarusiaq - pisariaqarpallu ilanngussat itisiliissutaasut - suliniummi peqataasut aningaasaliissutissatut akuerineqartut aningaasaliinissaminnut kissaateqalernerini tamatigut qinnuteqarnermut ilanngunneqartassapput.

• Aningaasanik qinnuteqaat (Rekvisition)
Suliniummi peqataasut suliniummut aningaasaliissutinik pissarniarnerini immersugassartaa nassiunneqassaaq. Aningaasanik qinnuteqaammut killiffimmik nalunaarusiaq kingullerpaaq ilaatinneqartuassaaq.

NORA-mi immersugassiat danskit oqaasiinik oqaasertaqarput, sapinngisamillu skandinaviamiut oqaasii atorlugit immersorneqassallutik. Immikkulli periarfissaqannginnerni, assersuutigalugu nunat sanilerisat suleqataatinneqarpata, qinnuteqarnermut immersugassaq tuluit oqaasii atorlugit immersorneqarsinnaavoq. Tuluit oqaasii atorlugit qinnuteqarnermi immersugassiaq nittartakkami uani aaneqarsinnaavoq.